കോഴിക്കോട് Dhishna Technologies ജോലി ചെയ്യുന്ന സമയം... സ്വന്തമായി നാല് കാശ് കയ്യില് വരാന് തുടങ്ങിയപ്പോ നാലാള് കേട്ടാല് പുറത്ത് തട്ടി അഭിനന്ദിക്കുന്ന ഒരു ശീലം തുടങ്ങി.
പുകവലി!
ഫുഡ് അടിച് സുബൈര്ക്കായുടെ പെട്ടികടയില് പോയി ഒരു കിങ്ങ്സ് വലിക്കുമ്പോള് എന്തെന്നില്ലാത്ത ഒരു ആത്മനിര്വൃതി കണ്ടെത്തിയിരുന്ന കാലം... ഒറ്റക്ക് പോയി വലിക്കാന് താല്പര്യം ഇല്ലാത്തതിനാല് പോവുമ്പോള് കൂടെ ആരെങ്കിലും ഉണ്ടാവുമായിരുന്നു... അന്നെനിക്ക് കൂടെ കിട്ടിയത് പുകവലി ശീലം ഇലാത്ത രോഷിതിനെ ആയിരുന്നു... Passive Smoking ന്റെ ബാലപാഠങ്ങള് അവനെ പഠിപ്പിച്ചു കൊണ്ട് ഞാന് വലിയിലെക്ക് ശ്രദ്ധ കൊടുത്തു...
റോഡിനു പുറം തിരിഞ്ഞു ഞാനും എന്റെ നേര്ക്ക് തിരിഞ്ഞു രോഷിതും നിക്കുന്നു... അവന്റെ കയ്യില് സുബൈര്ക്കയുടെ കൈപ്പുണ്യം കലര്ത്തിയ സോഡാ സര്ബത്ത്...
വലി ഏതാണ്ട് പകുതിയായപ്പോ സര്ബത്ത് കുടിച്ചു കൊണ്ടിരുന്ന രോഷിത് പെട്ടന്ന് കുടി നിര്ത്തി... പക്ഷെ ഗ്ലാസ് വായില് നിന്നും എടുക്കുന്നില്ല... എന്നിട്ട് കണ്ണ് കൊണ്ട് ആന്ഗ്യം കാണിക്കുന്നു...
"എന്താ?"
രോഷിത് ഒരക്ഷരം മിണ്ടുന്നില്ല... ഞാന് ഒരു പുക അകത്തേക്ക് എടുത്തു... പെട്ടന്ന് തോളില് ഒരു തട്ട്, പുകയൂതിക്കൊണ്ട് ഞാന് തിരിഞ്ഞു നോക്കി... എന്റെ കാല്പാദത്തില് നിന്നും നട്ടെല്ല് വഴി മെഡുല ഒബ്ലാംഗേറ്റയിലെക്ക് ഒരു ഒരു കൊള്ളിയാന് പാഞ്ഞു...
അച്ഛന് !!
ഞാന് തിരിഞ്ഞു രോഷിതിനെ നോക്കിയപ്പോ അവന്റെ പൊടി കാണാന് ഇല്ല... നിന്നിടം ശൂന്യം!! അച്ഛന് വളരെ ശാന്തന് ആയി എന്തൊക്കെയോ എന്നോട് പറഞ്ഞു. എവിടെയാ വന്നത്, എന്തിനാ വന്നത്.. പോവാന് സമയമായി... എന്നൊക്കെ, ഞാന് ഒന്നും കേട്ടില്ല... ചെവി രണ്ടിലും വണ്ട് മൂളുന്ന ശബ്ദം മാത്രം. അപ്പോളും ഞാന് സിഗരെറ്റ് നിലത്തിട്ടിട്ടില്ല... അതെന്റെ കയ്യില് ഇരുന്നു പുകയുന്നു...
"നീ വെള്ളിയാഴ്ച വീട്ടില് വരില്ലേ?"
ആ... അതു ഞാന് കേട്ടു.
"വരാം"
അച്ഛന് പോയി... എനിക്ക് 2 മിനിറ്റ് എടുത്തു സ്ഥലകാലബോധം വരാന്... സുബൈര്ക്ക ചിരിക്കുന്നു, സര്ബത്ത് കുടിക്കാന് വന്നവര് ചിരിക്കുന്നു... ഞാനും ചിരിച്ചു, സര്ബതിന്റെം കിങ്ങ്സിന്റെം പൈസ കൊടുത്ത് ഓഫീസില് എത്തിയപ്പോ രോഷിത് ചിരിച്ചു കൊണ്ട്,
"നീയെവിടെ ആയിരുന്നെടാ?"
ഞാന് പറഞ്ഞ മറുപടി ഇവിടെ എഴുതാന് പറ്റില്ല... എന്തായാലും ഞാന് പിന്നെ വീട് കണ്ടത് രണ്ടു ആഴ്ച കഴിഞ്ഞാണ്!!!
No comments:
Post a Comment