പണ്ടൊക്കെ ചെറിയ
കുട്ടിയായിരിക്കുമ്പോള് ചേച്ചിമാരുടെ കൂടെ ഷോപ്പിംഗ്നു പോവാന് ഇഷ്ടായിരുന്നു...
ഇടക്കിടക്ക് രസ്ന ഒക്കെ കൊണ്ട് കൊണ്ടുതരുന്നത് കൊണ്ട്... കുറച്ചൂടെ വലുതായപ്പോള്
നിര്ബന്ധിച്ചു കൂടെ കൊണ്ട് പോവാന് തുടങ്ങി. ചേച്ചിമാരുടെ സുരക്ഷ ഏറ്റെടുത്ത്
മുന്നില് നടക്കാന് ഒരാള് എന്നായിരുന്നു അന്നത്തെ എന്റെ ചിന്ത... പിന്നേം
കുറേകൂടെ വലുതായപ്പോള് പിടിച്ചു വലിച്ചു കൊണ്ട് പോവാന് തുടങ്ങി... അപ്പൊ
മനസ്സിലായി ചുരിദാറും സാരിയും ഒക്കെ വലിച്ചു വാരി ഇട്ടു അതിനിടയിലേക്ക് ഊളിയിട്ടു ഇറങ്ങി
കഴിഞ്ഞാല് പിന്നെ... എന്റെ സാറേ... ചുറ്റുമുള്ളതൊന്നും കാണാന് കഴിയില്ലാ.... പെറ്റിട്ട
മക്കളെ പോലും.... അങ്ങനെ ഉള്ള മക്കളെ നോക്കല് ആണ് എന്റെ പണി.
അതൊരു പ്രത്യേക
കാഴ്ച്ച ആണ്...
“ആ മഞ്ഞ
എടുത്തേ... ആ മഞ്ഞ അല്ല മറ്റേ മഞ്ഞ... ആ അത് തന്നെ...”
പാവം സേല്സ്
ഗേള് കഷ്ടപ്പെട്ട് മുകളിലും താഴെയും ഉള്ളതൊന്നും വീഴാതെ അത് വലിച്ചു പുറത്തിട്ടു
കവറില് നിന്ന് വലിച്ചെടുക്കുമ്പോള് കേള്ക്കാം...
“വേണ്ട... മറ്റേ
മഞ്ഞ എടുത്തേ...”
ആ മറ്റേ മഞ്ഞ
എടുത്തു കൊടുത്താല് ഇവര്ക്ക് ഒരു നൂറു കുറ്റം കാണും... കൈക്ക് നീളമില്ല... അര
ഇറുക്കം ആയിരിക്കും... കല്യാണ പന്തല് പോലെ ഉണ്ട് ഡിസൈന്... ഇതെല്ലാം കേട്ട് പാവം
സേല്സ് ഗേള് ഇങ്ങനെ എല്ലാരുടെം മുഖത്ത് മാറി മാറി നോക്കും... കുറ്റം മൊത്തം
കേട്ട് കഴിഞ്ഞാല് ഉടനെ അടുത്ത ചോദ്യം വരും
“ആ ഗ്രേ
ഒന്നെടുക്കാമോ?”
എടുക്കലും ഉത്തരം
വരും... കിലുക്കം രേവതി സ്റ്റൈല്...
“അയ്യേ...
വേണ്ട...!!! ആ സ്കൈ ബ്ലൂ ഒന്നെടുത്തെ...”
സ്കൈ ബ്ലൂ ചുരിദാര്
എടുത്ത് നാല് കുടയല് ഉണ്ട് സേല്സ് ഗേള്... നിന്നെയൊക്കെ കയ്യിലൊന്നു കിട്ടിയാല്
ഇങ്ങനെ കുടഞ്ഞു തരാമെടി എന്നാണ് അതിന്റെ അര്ഥം... അതിവര്ക്ക് മനസ്സിലാവില്ല...
എന്നിട്ട് ദേഹത്ത് വെച്ച് നോക്കും... ഹൊ ഇതെങ്കിലും ഇഷ്ടപ്പെട്ടല്ലോ എന്ന മുഖഭാവം
ആയിരിക്കും സേല്സ് ഗേള്ന്... അത് ഇവരുടെ വായില് നിന്നും കേള്ക്കാന് തലയും
ചരിച്ചു കാത്തു നില്ക്കുമ്പോള് ആയിരിക്കും അനിയത്തിയുടെ കമെന്റ് വരുക...
“എന്തോ പോലേണ്ടു
ലേ ചേച്ചീ...”
അപ്പൊ ചേച്ചീടെ
മറുപടി...
“അദന്നെ...”
അങ്ങനെ ഒരു
അമ്പതു ചുരിദാര് വലിച്ചിട്ടു കഴിഞ്ഞാല് തളര്ന്നു ഒരു ഇരിപ്പുണ്ട്.... കൂടെ ഒരു
കമെന്റും...
“ഇവിടെ പണ്ടത്തെ
പോലെ നല്ല കളക്ഷന് ഒന്നും ഇല്ലലെ ചേച്ചീ...”
അത് സേല്സ് ഗേള്
കേള്ക്കണം എന്ന് നിര്ബന്ധം ആണ്... ആ മിനിമം സൌണ്ട് എന്തായാലും ആ ചോദ്യത്തിനുണ്ടാവും...
“ചുരിദാര്
ഒന്നും ഇഷ്ടായില്ലെങ്കില് സാരി നോക്കാം മാഡം... ബ്രൈഡല് കളക്ഷന്സില് നല്ല
സാരികള് വന്നിട്ടുണ്ട്...”
കല്യാണം കഴിഞ്ഞു...
മക്കളായി... എന്നത് പോലും ചിന്തിക്കാതെ അങ്ങോട്ടോടും... കൂടെ ഞാനും...
അങ്ങനെ കല്യാണ സാരികള്
വലിച്ചു വാരി ഇടുമ്പോള് കുറ്റം പറയുന്നതിന്റെ കൂട്ടത്തില് ഞാന് ചുറ്റ്വട്ടത്തില്ലേ
എന്നൊരു അന്വേഷണം ഉണ്ട്... സെകണ്ടിന്റെ പത്തിലൊന്ന് സമയമേ എടുക്കു ആ കഴുത്ത്
വെട്ടിക്കലിനു... സഹികെട്ട് അവസാനം അവരുടെ അടുത്ത് പോയി ചോദിക്കും...
“അല്ല നിങ്ങള്
ചുരിദാര് വാങ്ങാനല്ലേ വന്നത്? പിന്നെന്തിനാ സാരി വലിച്ചിടുന്നത്...”
“ചുരിദാര്
നല്ലതൊന്നും ഇല്ല... അതോണ്ടാ സാരി നോക്കുന്നത്...”
“എന്നിട്ട് സാരി
വാങ്ങുന്നുണ്ടോ”
“ഇല്ലാ...”
“ഏ? പിന്നെന്തിനാ
ഇങ്ങനെ വലിച്ചു വാരി ഇട്ടു സമയം കളയുന്നത്? വേറെ ഷോപ്പില് പോയ്ക്കൂടെ?”
“നല്ല മോനല്ലേ
പോയി ഇരിയെടാ... ഒരു അര മണിക്കൂര്...”
“അര മണിക്കൂറോ...
ഇപ്പ എറങ്ങണം...”
“നീ നോക്കിക്കോ
നീ കെട്ടുന്ന പെണ്ണ് ഞങ്ങളെക്കാള് കഷ്ടമായിരിക്കും... ഈശ്വരാ ഇവന് ടെക്സ്ടൈല്സ്
നിന്നും ഇറങ്ങാത്ത ഒരു പെണ്ണിനെ കിട്ടണേ...”
“വേണ്ട... വേണ്ട...
വേണ്ട... ഞാന് ഇരുന്നോളാം... പ്രാകരുത് പ്ലീസ്...”
“ഈ സാരി
എങ്ങനെയുണ്ട്?”
എന്നോടാണ്... ഈ
ചോദ്യം സേല്സ് ഗേള് കേള്ക്കാന് വേണ്ടി ആണ്... ഞങ്ങള് വെറുതെ വലിച്ചു വാരി
ഇടുകയല്ല... വാങ്ങാന് തന്നെ ആണ്... എന്നാണു ഈ ചോദ്യം കൊണ്ട് സേല്സ് ഗേള്
മനസ്സിലാക്കിയിരിക്കണ്ടത്...
“നന്നായി
ചേരുന്നുണ്ട്... നല്ല ഡിസൈന്... വിലയും കുറവാണല്ലോ... 5000 രൂപ... എടുത്തോ... നിങ്ങളുടെ കളറിനു ചേരും...
നല്ല ഭംഗി ഉണ്ട്...”
അപ്പൊ തന്നെ
കണ്ണുരുട്ടി എനിക്ക് മാത്രം കേള്ക്കാന് പാകത്തിന് പറയും...
“പോയിരിയെടാ
അവിടെ...”
അങ്ങനെ ഇട്ടിട്ട്
പോവാന് പറ്റില്ലല്ലോ... കയ്യില് ഗൌരി ഉണ്ട്... പെണ്കുട്ടി ആണെങ്കില് വെറുതെ
ഇരിക്കുന്നില്ല... എന്നെ തോണ്ടി... മാന്തി... മൂക്ക് പിടിച്ചു വലിച്ചു ആകെ
പരാക്രമം... മടുത്തപ്പോള് എന്റെ മടിയില് എണീറ്റു നിന്ന് എന്റെ കവിളില്
നക്കും... എന്നിട്ട് അവിടെ കൈ കൊണ്ട് തുടയ്ക്കും.... പിന്നെ അടുത്ത കവിളില്
നക്കും... തുടയ്ക്കും... നല്ല കളി...
“എന്ത്
ഭംഗിയാലെ...”
ഓ... എന്നെയാണോ
എന്ന ചോദ്യത്തോടെ ഞാന് തല ചരിച്ചു നോക്കി... രണ്ടു അതി സുന്ദരികളായ പെണ്കുട്ടികള്
എന്റെ മുന്നില് ഇരിക്കുന്നു... ഞാന് ഗൌരിയെ മറയാക്കി ചുണ്ടൊക്കെ ഒന്ന് കടിച്ചു
ചുവപ്പിച്ചു... പ്രായം അതാണെ... ചോര തിളച്ചു കൊണ്ടിരിക്കുന്ന ഇരുപത്തി മൂന്നു...
ഒരു പ്രത്യേക നോട്ടം കൊടുത്തു പിള്ളേര്ക്ക്... കൂടെ ഒരു ചിരിയും...
“ചിരിക്കുന്നത്
നോക്ക്... എന്ത് രസാലെ...”
ഇതെന്താ പെണ്കുട്ടികള്
ഇങ്ങനെ ഒരാങ്കുട്ടിയെ നോക്കി കമന്റ് അടിക്കുമോ? എനിക്ക് വയ്യ....
“നല്ല ഫ്രോക്ക്
അല്ലെ?”
ഫ്രോക്ക്? ഞാന്
ജീന്സ് അല്ലെ ഇട്ടിരിക്കുന്നത്? ഓ... ഈ പറഞ്ഞതൊക്കെ ഗൌരിയെ ആണ്... ആഹ... വെറുതെ
തെറ്റിദ്ധരിച്ചു... പെട്ടന്ന് എന്നെ ഞെട്ടിച്ചു കൊണ്ട് ഗൌരി എന്റെ മൂക്കില്
തൊട്ടു കൊണ്ട്...
“അച്ഛ...”
ഞെട്ടിപ്പോയ ഞാന്
ഗൌരിക്ക് കേള്ക്കാന് പാകത്തിന്...
“അച്ഛനല്ല...
മാമന്... മാമന്...”
“അച്ഛ... അച്ഛ...
അച്ഛ... അച്ഛ...”
“ഒന്ന് നിര്ത്ത്
മോളെ, മാനം കളയല്ലേ... ഞാന് മാമനല്ലേ... മാമന്... മാമന്...”
ഗൌരി എന്നെ
കഴുത്തിലൂടെ കെട്ടിപിടിച്ചു വീണ്ടും...
“അച്ഛ...”
“മോളെ നിന്റെ
അച്ഛന് മനോജന് പി പി... ഞാന് സൂരജ്... നിന്റെ മാമന്... പറ ഞാനാരാ...”
“മാമം...”
“ഏ...”
“അച്ഛാ...”
മിണ്ടാതിരുന്നു
നോക്കാം... ചെലപ്പോ നിര്ത്തിക്കോളും... ഞാന് വേറെ എങ്ങോട്ടോ നോക്കി ഇരുന്നു… അപ്പോള് ഗൌരി എന്റെ മുഖം രണ്ടു കൈ കൊണ്ടും
നേരെ പിടിച്ചു...
“അച്ഛ...”
ആ രണ്ടു പെണ്കുട്ടികള്
ഗൌരിയുടെ കളി കണ്ടു ചിരിച്ചു കൊണ്ടേ ഇരിക്കുന്നു... അവര്ക്ക് പോവാനായപ്പോള് എണീറ്റു...
ഞങ്ങളുടെ അടുത്തേക്ക് വന്നു... ഗൌരിയുടെ മുടിയില് തലോടി... എന്നോട്....”
“മോള്ക്ക് എത്ര
വയസ്സായി?”
ആര്ക്കോ വേണ്ടി ഒരു
താല്പര്യവും ഇല്ലാതെ ഞാന് പറഞ്ഞു...
“ഒന്നര...”
അവര് പോയി... ഞാന്
ഗൌരിയെ സൂക്ഷിച്ചു നോക്കി... ഗൌരി എന്നെയും... ഇപ്പൊ അവള്ക്ക് അച്ഛ വിളിയും ഇല്ല കളിയും
ഇല്ല... എന്നെ തന്നെ നോക്കി ഇരിക്കുന്നു... ഞാന് വീണ്ടും നോക്കി...
“എന്റെ മടിയില്
കേറി ഇരുന്നിട്ട്... എനിക്കിട്ട് പണിയുന്നോ? കള്ളത്തി.... ഇരിക്കിവിടെ”
ഞാന് എന്റെ
മടിയില് നിന്നും എടുത്തു എന്റെ അടുത്തിരുത്തി... ഞാന് മിണ്ടാതെ ഇരുന്നു... ഗൌരി
എന്നെ പിടിച്ചു എണീറ്റു... എന്റെ താടി പിടിച്ചു.... എനിക്ക് ചിരി വരുന്നുണ്ട്...
“മാമാ... മ്പു...”
ഞാന് ഗൌരിയെയും
എടുത്ത് എണീറ്റു... ഞാന് ഒന്നൂടെ അവളെ നോക്കി... എന്തായിരിക്കും എന്നെ ഇങ്ങനെ
കുടഞ്ഞു ആറിയിടാന് ഈ പൊടിക്ക് തോന്നാന് കാരണം... അപ്പൊ ഗൌരി ഒന്നൂടെ എന്നെ ഓര്മ്മിപ്പിച്ചു...
“മ്പു... മ്പു...
മ്പു...”
“ആ തരാം...
പോവല്ലേ അങ്ങോട്ട്...”
പലതരം പണികള്
കിട്ടിയിട്ടുണ്ട്... ഇത് നല്ല നൈസ് പണി... അതും ഒന്നര വയസ്സുള്ള ഒരു പിടുങ്ങിന്റെ
അടുതൂന്ന്...